روبوتات متنكرة فى شكل الناس

 #معلش الموضوع طويل بس دا عن تجربة واعتقد ناس كتير مر عليها باللي هقوله

زمان كدا يجي من حوالي 17 سنه اما كنت اشوف الناس مكشرة فى الشوارع او المواصلات او انى لما اكلم حد الاقيه مكشر كنت اقول فى بالي اية اللى يمنع الناس انها تضحك فى وش بعضها رغم همومها انسو الهموم لحظة ما تتواصلو

#الزرار الاول

كبرت وبقى عندي ( زرار ) ادوس عليه عشان اضحك فى وش الناس رغم انى كنت ابقى مدايق ومخنوق من جوايا بس كنت اضحك عشان اللى قدامى ميزعلش ومع الوقت الزرار دا باظ من كتر ما الواحد استخدمه عشان يضحك قدام الناس ويجاملهم عشان ميزعلوش وفي اللى فيهم ملوش ذنب انه يشوف حزنك او غضبك بردو

#الزرار الصيني

وبقى فى (زرار تانى اسمه اهرب ) عشان محدش يشوف زعلك وتكشيرتك وحزنك بس دا زرار صيني بيبوظ بسرعه لانك كراجل مش هتستحمل الهروب دا والاسئلة الكتير ،

اثناء كل دا انت بتمر بناس كتير فى اللى يحترم اللى انت فيه ويسكت او يحاول يخرجك من اللى انت فيه ويساعدك ،

#الاسوء ان فى اللى عاوزك روبوت يدوس عليك تضحك يدوس عليك تشتغل يدوس عليك تسقف ملوش دعوة انت فيك اية ولا مهتم حتي يسمعك ولو سمعك هيجمعلك الف حجة انك بتستهبل وان الحياة اسهل من اللى انت بتمر بيه ودايما يرمو اللوم عليك ، دول انت بالنسبه ليهم عبد بزرار تنفذ فقد المطلوب منك (ودول للاسف اكتر ناس ضحكت ف وشهم وجاملتهم )

#الهراب ودا اللى بيبعد عنك عشان يحترم خصوصيتك ويسيبك تحل مشاكلك مع نفسك او هو عنده ما يكفيه من مشاكل فا مش هيقدر يساعدك ،

وخلاص بقى الاوبشن الاخير عندك خلي اللى يشوفك زعلان ومكشر يشوفك بقى لا يفرق معاك حاجة ولا حد زرايرك باظت من كتر الاستعمال وعدم صيانة اللى جواك

بس فى لحظة كدا بتكون فاصلة في حياة اى حد بيقف فيها الزمن معك وتراجع وتفتكر كل حاجة عديت بيها فا هتلاقي .... (انك انسان مش روبوت ربنا خلقني عبد ليه هو فقط ، ربنا خلقنا من غير زراير احنا اللى عملناها مش من حق حد يطلب مني اضحك وانا مدايق من جوايا اى كان السبب يزول السبب اللى مزعلنى وهضحك والله ، مش من حق حد يطلب مني اعمل حاجة انا مش مقتنع بيها بناء على عقيدتي وديني مش بناء على هوايا او هواه ، مش من حق حد يخليني اسقف على كلام عبثي وسفاهه من قائله )

كفايا كدا بنسمع كل يوم عن حالات انتحار وموت فجاة لناس يعز علينا فقدانهم

طب والحل يا محترم .... الحل هو العلاقة الغير مشروطة وان الناس تدي مساحه لفهم بعضها البعض والتقدير فى اى حاجة انا بحب وبحترم فلان وبتعامل معاه لشخصه (عشان صفاته واخلاقه وصلاح نفسه ) مش عشان عاوز منه حاجة

احنا مش روبوتس

#محمودحسين

مسموح بالمشاركة مش بالسرقة واخد بالك يا حرامي البوستات ... اضحك